[Titulum secundum cod. A] X. De familiaritate extranearum mulierum.
[Titulum secundum cod. R] X. Quae mulieris in domus habitent clericorum.
[Titulum secundum coll. Hispanam] X. Vt nullus clericorum cum extraneis feminis habitet.
Id etiam ad custodiendam uitam et famam speciali ordinatione praecipimus, ut nullus clericorum extraneae mulieri qualibet consolatione aut familiaritate iungatur. Et non solum in domum illius extranea mulier non accedat, sed nec ipse frequentandi ad extraneam mulierem habeat potestatem, sed cum matre tantum, sorore, filia et nepte, si habuerit aut uoluerit, uiuendi liberam habeat potestatem, de quibus nominibus nefas est aliud, quam natura constituit, suspicari.
(ed. Munier 1963: 199-200, 220, 222, 224)