Canon 13
De sacerdotibus qui uexantes cadere uidentur.
Bene siquidem Maiorum regulis definitum est ut daemoniis aliisque similibus passionibus irretitis ministeria sacra tractare non liceat. Cui praecepto consensu rationis adhibito id communiter definiuimus, ut nullus de his qui aut in terram arrepti a daemonibus eliduntur aut quolibet modo uexationis incursibus efferuntur, uel sacris audeant ministrare altariis uel indiscussos se diuinis ingerant sacramentis, exceptis illis qui uariis corporum incommoditatibus dediti sine huiusmodi passionibus in terram approbantur elisi. Qui tamen et ipsi tamdiu erunt ab officii sui ordine et loco suspensi quousque unius anni spatio per discretionem episcopi inueniantur ab incursu daemonum alieni.
(eds. Martínez Díez, Rodríguez 2002: 122-123)