The letter is addressed to Bishop Thalasius of Angers. Its first part concerns the proper observance of various feasts.
De clericis uero bigamis, usque ad ostiarios ecclesia permittit et patitur; et quam quis sacerdotum regulam pro districtione sua assumpserit, iure custodiet. Exorcistas uero aut subdiaconos a secundis nuptiis penitus excludit.
Generationem uero filiorum ab his quos coniugatos assumimus, melius esset, si fieri possit, arceri: quos melius est non assumi, quam de his postea sub diuersa sensuum uarietate certari, cum melius sit omnes disceptationum causas excludi; ut qui non uult in clericatu generari, non constituat in altario coniugatos.
Haec pro consuetudine ecclesiarum nostrarum, quarum una est regula, paginae huius sermone texuimus, si quid uero pro honore Domini potest districtionis accrescere; et si imitari non possumus, pro Domini honore laudabimus. Nam iam ecclesiae obsequiis aggregatos ad secundas nuptias transire non patimur: quos, postquam assumpti fuerint, etiam a primis penitus arcemus, exorcistas dumtaxat atque subdiaconos.
In Augustodunensi autem ecclesia, uel ostiarius in imo officio constitutus, si uxorem aliam acceperit, ab officio penitus abdicatur. Subdiaconos autem ad pacem inter se in sacrario oportet accedere; in altario autem nonnisi dum porrigunt pallas diacono aut suscipiunt quod refertur; ad pacem autem nequaquam eis permissum est. Si autem illius amentiae fuerit uel exorcista uel subdiaconus uel etiam sicut superius memoratum est ostiarius, ut secundis se nuptiis illigarit, non solum ab officio sed etiam a communione penitus arcetur.
(ed. Munier 1963: 140-141)