Canon 1
De his qui altario ministrant, ut a sanguine omni se abstineant.
De his clericis qui in obsessionis necessitate positi fuerint, id statutum est, ut qui altario ministrant et Christi sanguinem tradunt uel uasa sacro officio deputata contractant, ut ab omni humano sanguine etiam hostili abstineant. Quod si in hoc inciderint, duobus annis tam officio quam conmunione priuentur, ita ut his duobus annis uigiliis, ieiuniis, orationibus et elemosinis pro uiribus quas Dominus donauerit, expientur; et ita demum officio uel conmunioni reddantur, ea tamen ratione, ne ulterius ad officia potiora promoueantur. Quod si infra praefinitum tempus neglegentiores circa salutem suam exstiterint, protelandi ipsius poenitentiae tempus in potestate maneat sacerdotis.
(eds. Martínez Díez, Rodríguez 1984: 299-300)